Die Groot Vyf se Geheimnisse in Dinokeng
Dinokeng is Gauteng se enigste vrylopende Groot Vyf reservaat – en by Thorn Tree Bush Camp leer ons vinnig dat die bos meer geheime het as wat ’n mens in ’n kampdagboek kan neerskryf. Elke olifantspoor, elke leeu wat in die nag brul, en selfs die ongemaklike stilte wanneer die krieke ophou tjirp, is deel van ’n groter storie.
Ons tente en hutte het elk hul eie geheime – soms fluister die wind dit, soms vertel die diere self. Soos ons gaste al sê: ‘As die mure van Monkey Thorn Cottage kon praat, sou hulle boeke vol tesè gehad het!’
Die Olifant: Die Sagte Reus met ’n Skelm Streek
Olifante is die bos se reusagtige tuinmanne – hulle skuif bome rond soos jy stoele skuif by die braai. Hul geheime? Hulle hou daarvan om oor grense te loer en sommer in jou kookpot te proe.
By die Monkey Thorn Cottage het ons al gesien hoe bulle sommer net kom lê en rus. Maar nie voor hulle eers ’n bietjie drama veroorsaak nie – veral as die mannetjiesleeus naby baklei, of die hiënas hul ‘romantiese opera’ begin sing in die nag. En dan, tussen dit alles, stap die vlakvark doodluiters verby asof niks gebeur het nie. ’n Cottage met stories genoeg vir ’n sepie!
Die Buffel: Stil Soldate van die Bos
Buffels lyk kalm, maar dis ’n skyn. Hulle is die bos se stil soldate wat saamspan soos ’n weermag. Ons het al gesien hoe hulle spookstil deur die doringbos beweeg en net ewe skielik almal tegelyk stilstaan en jou aanstaar. Een gas het eenkeer gedink hulle lyk so vriendelik soos ‘koeie met horings’ – hy dra vandag nog net kakie klere in die bos.
Die Renoster: Die Antieke Wagter
Renosters lyk soos ’n oorgeblewe dinosourus wat net hier verdwaal het. Hul geheim is eenvoudig: gras kou en modderbad hou.
Maar soms gee hulle ook vertonings. By Black Thorn het drie renosters soos sekuriteitswagte verbygeloop – reguit in ’n lyn, neus aan stert, asof hulle die kamp se ‘perimeter inspeksie’ kom doen. Gaste het hulle later ‘die dinogroep van Dinokeng’ gedoop.
Die Luiperd: Die Spook van die Bos
Jy sien hom selde, maar hy sien jou altyd. Hy’s die bos se wegkruipertjie-kampioen.
By die Elephant Root Luxury Tent vertel ons graag die storie van die luiperd wat gaste vroegoggend wakker gemaak het. Sy brul was so laag en hard, dit het soos ’n kettingsaag geklink wat aangeskakel word. Een gas het later gesê hy’t gedink iemand is besig om die tent se stoele te saag!
Die Leeu: Die Nagsanger
Die leeu se brul is meer as net ’n basuin van mag – dis sy liefdeslied en grensverklaring in een.
By Black Thorn Camp het twee leeuwyfies eendag besluit om onder die hoekboom te gaan lê – reg waar gaste gewoonlik hul middag-slapie doen. Vir ure lank het hulle net rustig gelê, terwyl die mense binne die tente probeer fluister het soos kinders wat wegkruip vir die juffrou.
En in die nag is dit altyd die leeus wat die kamp se stiltes vul – veral as jy om 2-uur wakker skrik en besef jy slaap in die hart van Afrika.
Slotgedagte
Die Groot Vyf se geheime lê nie net in hul krag of hul grootte nie, maar in die klein oomblikke wat hulle die bosveld mee vul. By Thorn Tree Bush Camp is elke eenheid – of dit nou Monkey Thorn, Elephant Root of Black Thorn is – ’n storieboek op sy eie.
Van mannetjiesleeus wat baklei, hiënas wat hul vreemde hofmakery beoefen, renosters wat soos wagte verbyparadeer, tot die luiperd wat jou soggens wakker sing soos ’n kettingsaag – die bos deel sy geheime net met dié wat stil genoeg luister… en dapper genoeg is om dit langs die kampvuur oor te vertel.
Maar soms gaan dit nie oor die Groot Vyf nie – dis die stilte van die nag en die sterre wat met jou praat. As jy fyn luister, hoor jy dalk die paddas en insekte, die naguiltjies, die klein-pearl spotted uiltjie of selfs die bosapies wat roep. By Thorn Tree Bush Camp leer jy gou: dit is veel meer as net die Groot Vyf. Om in ’n tent te slaap bring die ware magie van die bos na vore.